ಹಾವೇರಿ: ರಾಜ್ಯದಲ್ಲಿ ಸಿದ್ದರಾಮಯ್ಯ ನೇತೃತ್ವದ ಕಾಂಗ್ರೆಸ್ ಸರ್ಕಾರ ಅಧಿಕಾರಕ್ಕೆ ಬಂದು ಯಶಸ್ವಿ 1,000 ದಿನಗಳನ್ನು ಪೂರೈಸುತ್ತಿರುವ ಹಿನ್ನೆಲೆಯಲ್ಲಿ, ಫೆಬ್ರವರಿ 13ರಂದು ಹಾವೇರಿ ಜಿಲ್ಲೆಯಲ್ಲಿ ಐತಿಹಾಸಿಕ ಮತ್ತು ಬೃಹತ್ ಸಾರ್ವಜನಿಕ ಸಮಾರಂಭವನ್ನು ಆಯೋಜಿಸಲಾಗಿದೆ. ಈ ಸಮಾರಂಭವು ಕೇವಲ ರಾಜಕೀಯ ಶಕ್ತಿ ಪ್ರದರ್ಶನವಾಗದೆ, ಲಕ್ಷಾಂತರ ಬಡವರ ಬದುಕಿಗೆ ಭದ್ರತೆ ನೀಡುವ ವೇದಿಕೆಯಾಗಲಿದೆ.
ರಾಜ್ಯದ ವಿವಿಧೆಡೆ ಸರ್ಕಾರಿ ಜಮೀನುಗಳಲ್ಲಿ ಅಥವಾ ಸ್ವಂತ ಸೂರು ಇಲ್ಲದೆ ದಶಕಗಳಿಂದ ವಾಸಿಸುತ್ತಿದ್ದ ಸಾವಿರಾರು ಕುಟುಂಬಗಳು, ತಲೆ ಮೇಲೆ ಸೂರು ಇದ್ದರೂ ಕಾನೂನುಬದ್ಧ ದಾಖಲೆಗಳಿಲ್ಲದೆ ಆತಂಕದಲ್ಲಿ ಬದುಕುತ್ತಿದ್ದವು. ಇಂತಹ ಅಸಹಾಯಕ ಕುಟುಂಬಗಳಿಗೆ ನೆಮ್ಮದಿ ಒದಗಿಸಲು ಸರ್ಕಾರ ಬದ್ಧವಾಗಿದ್ದು, ಈ ಸಮಾರಂಭದಲ್ಲಿ ಬರೋಬ್ಬರಿ ಒಂದು ಲಕ್ಷಕ್ಕೂ ಹೆಚ್ಚು ಜನರಿಗೆ ‘ಮನೆ ಮಾಲೀಕತ್ವದ ಹಕ್ಕುಪತ್ರ’ಗಳನ್ನು ವಿತರಿಸಲು ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ನಿರ್ಧರಿಸಿದ್ದಾರೆ.
https://x.com/krishnabgowda/status/2017082248462553430?s=20
ಏನಿದರ ಮಹತ್ವ?
ಈ ಹಕ್ಕುಪತ್ರಗಳು ಕೇವಲ ಒಂದು ಕಾಗದದ ಚೂರುಗಳಾಗಿರದೆ, ಬದಲಿಗೆ ಬಡವರ ಬದುಕಿನ ಆಧಾರಸ್ತಂಭಗಳಾಗಿವೆ. ಹಕ್ಕುಪತ್ರ ಸಿಗುವುದರಿಂದ ಈ ಕುಟುಂಬಗಳು ತಮ್ಮ ಮನೆಯ ಮೇಲೆ ಅಧಿಕೃತ ಮಾಲೀಕತ್ವವನ್ನು ಪಡೆಯುತ್ತವೆ. ಇದರಿಂದ ಬ್ಯಾಂಕ್ ಸಾಲ ಸೌಲಭ್ಯ, ಸರ್ಕಾರದ ವಸತಿ ಯೋಜನೆಗಳ ಅಡಿ ಸಬ್ಸಿಡಿ ಮತ್ತು ಇತರ ಕಾನೂನುಬದ್ಧ ಸವಲತ್ತುಗಳನ್ನು ಪಡೆಯಲು ದಾರಿ ಸುಗಮವಾಗಲಿದೆ. “ನಾವು ನುಡಿದಂತೆ ನಡೆದಿದ್ದೇವೆ, ಬಡವರ ಪರವಾದ ಆಡಳಿತ ನೀಡಿದ್ದೇವೆ ಎಂಬುದಕ್ಕೆ ಈ ಹಕ್ಕುಪತ್ರ ವಿತರಣೆಯೇ ಸಾಕ್ಷಿ,” ಎಂದು ಕಾಂಗ್ರೆಸ್ ಮುಖಂಡರು ಬಣ್ಣಿಸಿದ್ದಾರೆ.
ಇದನ್ನೂ ಓದಿ | ಎಐಎಡಿಎಂಕೆ ಪಾಪ ತೊಳೆದ ‘ಬಿಜೆಪಿ ವಾಷಿಂಗ್ ಮೆಷಿನ್’: ಸ್ಟಾಲಿನ್ ವಾಗ್ದಾಳಿ
ಏಲಕ್ಕಿ ನಗರಿ ಹಾವೇರಿಯಲ್ಲಿ ಈ ಕಾರ್ಯಕ್ರಮಕ್ಕಾಗಿ ಭರ್ಜರಿ ತಯಾರಿ ನಡೆದಿದೆ. ಕಂದಾಯ ಇಲಾಖೆ ಮತ್ತು ಜಿಲ್ಲಾಡಳಿತವು ಫಲಾನುಭವಿಗಳ ಪಟ್ಟಿಯನ್ನು ಅಂತಿಮಗೊಳಿಸಿದ್ದು, ಯಾವುದೇ ಅರ್ಹ ಬಡವನಿಗೂ ಅನ್ಯಾಯವಾಗದಂತೆ ಎಚ್ಚರವಹಿಸಲಾಗಿದೆ. ಫೆಬ್ರವರಿ 13ರಂದು ನಡೆಯುವ ಈ ಸಮಾವೇಶದಲ್ಲಿ ಮುಖ್ಯಮಂತ್ರಿಗಳಲ್ಲದೆ, ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಮತ್ತು ಸಂಪುಟದ ಪ್ರಮುಖ ಸಚಿವರು ಭಾಗವಹಿಸಲಿದ್ದಾರೆ. 1,000 ದಿನಗಳ ಆಡಳಿತದಲ್ಲಿ ಜಾರಿಗೆ ತಂದ ‘ಗ್ಯಾರಂಟಿ’ ಯೋಜನೆಗಳ ಯಶಸ್ಸಿನ ಜೊತೆಗೆ, ಈ ಹಕ್ಕುಪತ್ರ ವಿತರಣೆಯು ಲೋಕಸಭೆ ಮತ್ತು ಸ್ಥಳೀಯ ಸಂಸ್ಥೆ ಚುನಾವಣೆಗಳ ಮೇಲೂ ಪ್ರಭಾವ ಬೀರುವ ಸಾಧ್ಯತೆಯಿದೆ.
About The Author
