ಬೆಂಗಳೂರು: ಸಾರ್ವಜನಿಕರ ಹಣಕ್ಕೆ ಭದ್ರತೆ ಒದಗಿಸುವ ಮತ್ತು ಚಿಟ್ ಫಂಡ್ ವ್ಯವಹಾರದಲ್ಲಿ ಪಾರದರ್ಶಕತೆ ತರುವ ನಿಟ್ಟಿನಲ್ಲಿ ಮೈಸೂರು ಸೇಲ್ಸ್ ಇಂಟರ್ನ್ಯಾಷನಲ್ ಲಿಮಿಟೆಡ್ (MSIL) ಮಹತ್ವದ ಹೆಜ್ಜೆ ಇಟ್ಟಿದೆ. ಎಂಎಸ್ಐಎಲ್ ಅಭಿವೃದ್ಧಿಪಡಿಸಿರುವ ನೂತನ ಸಾಫ್ಟ್ವೇರ್ ಮತ್ತು ಮೊಬೈಲ್ ಆ್ಯಪ್ ಅನ್ನು ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಶನಿವಾರ ವಿಧಾನಸೌಧದ ಬ್ಯಾಂಕ್ವೆಟ್ ಸಭಾಂಗಣದಲ್ಲಿ ಲೋಕಾರ್ಪಣೆ ಮಾಡಿದರು.
ಮೋಸ ಹೋಗಬೇಡಿ, ಸರ್ಕಾರಿ ಸಂಸ್ಥೆ ನಂಬಿ:
ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ಸಿಎಂ ಸಿದ್ದರಾಮಯ್ಯ ಅವರು, “ಇತ್ತೀಚಿನ ದಿನಗಳಲ್ಲಿ ಖಾಸಗಿ ಚಿಟ್ ಫಂಡ್ ಕಂಪನಿಗಳನ್ನು ನಂಬಿ ಸಾರ್ವಜನಿಕರು ಹೂಡಿಕೆ ಮಾಡಿ ಹಣ ಕಳೆದುಕೊಳ್ಳುತ್ತಿದ್ದಾರೆ. ಆದರೆ ಎಂಎಸ್ಐಎಲ್ ಸಂಪೂರ್ಣ ಸರ್ಕಾರಿ ಸ್ವಾಮ್ಯದ ಸಂಸ್ಥೆಯಾಗಿರುವುದರಿಂದ ಇಲ್ಲಿ ಮೋಸದ ಪ್ರಶ್ನೆಯೇ ಉದ್ಭವಿಸುವುದಿಲ್ಲ. ಜನರು ತಮ್ಮ ಕಷ್ಟಾರ್ಜಿತ ಹಣವನ್ನು ಸುರಕ್ಷಿತವಾಗಿ ಹೂಡಿಕೆ ಮಾಡಲು ಎಂಎಸ್ಐಎಲ್ ಅತ್ಯುತ್ತಮ ವೇದಿಕೆ,” ಎಂದು ಭರವಸೆ ನೀಡಿದರು.
5 ಸಾವಿರ ಕೋಟಿ ವಹಿವಾಟಿನ ಗುರಿ:
ಪ್ರಸ್ತುತ ಎಂಎಸ್ಐಎಲ್ನ ಚಿಟ್ ಫಂಡ್ ವಹಿವಾಟು ವಾರ್ಷಿಕ ಸುಮಾರು 500 ಕೋಟಿ ರೂಪಾಯಿಗಳಷ್ಟಿದೆ. ಇದನ್ನು ಮುಂದಿನ ಐದು ವರ್ಷಗಳಲ್ಲಿ 5,000 ಕೋಟಿ ರೂಪಾಯಿಗಳಿಗೆ ಏರಿಸುವ ಬೃಹತ್ ಗುರಿಯನ್ನು ಸಿಎಂ ಸಂಸ್ಥೆಯ ಮುಂದೆ ಇಟ್ಟಿದ್ದಾರೆ. ಡಿಜಿಟಲೀಕರಣದಿಂದಾಗಿ ಗ್ರಾಹಕರು ಈಗ ಮನೆಯಲ್ಲೇ ಕುಳಿತು ತಮ್ಮ ಚಿಟ್ ವಿವರಗಳನ್ನು ವೀಕ್ಷಿಸಬಹುದು ಮತ್ತು ಪಾವತಿ ಮಾಡಬಹುದು. ಇದು ಸಂಸ್ಥೆಯ ಮೇಲಿನ ವಿಶ್ವಾಸಾರ್ಹತೆಯನ್ನು ಹೆಚ್ಚಿಸಲಿದೆ ಎಂದು ಅವರು ಆಶಯ ವ್ಯಕ್ತಪಡಿಸಿದರು.
ಇದನ್ನೂ ಓದಿ | “ಯತೀಂದ್ರ ಅವರೇ ನಮ್ಮ ಹೈಕಮಾಂಡ್” : ಡಿಕೆ ಶಿವಕುಮಾರ್ ಹೇಳಿಕೆ
ಆ್ಯಪ್ನ ವಿಶೇಷತೆಗಳೇನು?
ಈ ಮೊಬೈಲ್ ಆ್ಯಪ್ ಮೂಲಕ ಚಂದಾದಾರರು ತಮ್ಮ ಮಾಸಿಕ ಕಂತು ಪಾವತಿ, ಹರಾಜಿನ ವಿವರಗಳು ಮತ್ತು ಲಾಭಾಂಶದ (Dividend) ಮಾಹಿತಿಯನ್ನು ಕ್ಷಣಾರ್ಧದಲ್ಲಿ ಪಡೆಯಬಹುದು. ಸಣ್ಣ ಹೂಡಿಕೆದಾರರು ಮತ್ತು ಮಧ್ಯಮ ವರ್ಗದ ಜನರಿಗೆ ಅನುಕೂಲವಾಗುವಂತೆ ಈ ತಂತ್ರಜ್ಞಾನವನ್ನು ರೂಪಿಸಲಾಗಿದೆ. ಕಾರ್ಯಕ್ರಮದಲ್ಲಿ ಸಚಿವರು ಹಾಗೂ ಎಂಎಸ್ಐಎಲ್ನ ಉನ್ನತ ಅಧಿಕಾರಿಗಳು ಉಪಸ್ಥಿತರಿದ್ದರು.
About The Author
