Coconut Shell: Why is it that coconut shells, which used to be thrown into the oven, are now being sold at the price of gold, around 30 to 35 rupees per kilo? –ದಕ್ಷಿಣ ಕನ್ನಡದಲ್ಲಿ ತೆಂಗಿನ ಚಿಪ್ಪಿಗೆ ಭಾರಿ ಬೇಡಿಕೆ ಬಂದಿದೆ. ಕೇರಳದಿಂದ ಬರುವ ವ್ಯಾಪಾರಿಗಳು ಕಿಲೋ ಚಿಪ್ಪಿಗೆ 30 ರಿಂದ 35 ರೂ. ನೀಡಿ ಖರೀದಿಸುತ್ತಿದ್ದು, ಇದು ಮಹಿಳೆಯರಿಗೆ ಆದಾಯದ ಮೂಲವಾಗಿದೆ.
ದಕ್ಷಿಣ ಕನ್ನಡ: ಕೆಲವು ವರ್ಷಗಳ ಹಿಂದೆ ತೆಂಗಿನಕಾಯಿಯ ತಿರುಳನ್ನು ತೆಗೆದ ಬಳಿಕ, ಉಳಿದ ಆ ಕಪ್ಪು ಬಣ್ಣದ ‘ತೆಂಗಿನ ಚಿಪ್ಪನ್ನು’ ಯಾವುದೇ ಪ್ರಯೋಜನವಿಲ್ಲದ ಕಸವೆಂದು ಒಲೆಗೆ ಎಸೆಯುತ್ತಿದ್ದೆವು ಅಥವಾ ಎಲ್ಲೆಂದರಲ್ಲಿ ಬಿಸಾಡುತ್ತಿದ್ದೆವು. ಆದರೆ ಇನ್ನು ಮುಂದೆ ನಿಮ್ಮ ಮನೆಯಲ್ಲಿ ತೆಂಗಿನ ಚಿಪ್ಪನ್ನು ಎಸೆಯುವ ಮುನ್ನ ನೀವು ನೂರು ಬಾರಿ ಯೋಚಿಸಬೇಕು. ಹೌದು, ಕರಾವಳಿ ಭಾಗದಲ್ಲಿ ಇಡೀ ತೆಂಗಿನಕಾಯಿಗೆ ಬೆಲೆ ಹೆಚ್ಚಾದಂತೆ, ಅದರ ಚಿಪ್ಪಿಗೂ ಈಗ ಎಲ್ಲಿಲ್ಲದ ಬೇಡಿಕೆ ಬಂದಿದೆ. ಅಡುಗೆ ಮನೆಯ ಕಸದಂತೆ ಮೂಲೆಗುಂಪಾಗಿದ್ದ ತೆಂಗಿನ ಚಿಪ್ಪು ಇಂದು ಮಹಿಳೆಯರ ಪಾಲಿಗೆ ಕೈತುಂಬಾ ಹಣ ತಂದುಕೊಡುವ ‘ಕಾಮಧೇನು’ವಾಗಿ ಬದಲಾಗಿದೆ.
ಕೇರಳದಿಂದ ಬಂದು ಚಿಪ್ಪು ಖರೀದಿಸುತ್ತಿರುವ ವ್ಯಾಪಾರಿಗಳು: ದಕ್ಷಿಣ ಕನ್ನಡ ಜಿಲ್ಲೆಯ ಮನೆಮನೆಗೆ ಈಗ ಕೇರಳ ಭಾಗದಿಂದ ವಿಶೇಷ ಖರೀದಿದಾರರು ವಾಹನಗಳನ್ನು ತೆಗೆದುಕೊಂಡು ಲಗ್ಗೆ ಇಡುತ್ತಿದ್ದಾರೆ. ವ್ಯರ್ಥವಾಗಿ ಬೀಳುವ ತೆಂಗಿನ ಚಿಪ್ಪನ್ನು ಸಂಗ್ರಹಿಸಿ ಕೊಂಡೊಯ್ಯಲು ಅವರು ಮುಗಿಬಿದ್ದಿದ್ದಾರೆ. ಮಾರುಕಟ್ಟೆಯಲ್ಲಿ ಒಂದು ಕಿಲೋ ತೆಂಗಿನ ಚಿಪ್ಪಿಗೆ ಬರೋಬ್ಬರಿ 30 ರಿಂದ 35 ರೂಪಾಯಿಗಳನ್ನು ನೀಡಿ ಖರೀದಿಸಲಾಗುತ್ತಿದೆ. ಅಷ್ಟೇ ಅಲ್ಲದೇ, ಒಂದು ಇಡೀ ತೆಂಗಿನಕಾಯಿಯ ಎರಡು ಭಾಗದ ಚಿಪ್ಪಿಗೆ 1 ರಿಂದ 2 ರೂಪಾಯಿ ವರೆಗೂ ಹಣ ಸಿಗುತ್ತಿದೆ. ಈ ಕಾರಣಕ್ಕಾಗಿ ಇಂದು ಕರಾವಳಿಯ ಸ್ತ್ರೀಯರು ಅಡುಗೆ ಮನೆಯಲ್ಲೇ ತೆಂಗಿನ ಚಿಪ್ಪುಗಳನ್ನು ಜೋಪಾನವಾಗಿ ಬದಿಗಿಟ್ಟು ಮಾರಾಟ ಮಾಡಲು ಶುರು ಮಾಡಿದ್ದಾರೆ.
ಚಿಪ್ಪಿನ ಹಿಂದಿರುವ ರಹಸ್ಯವೇನು? : ಹಿಂದಿನ ಕಾಲದಲ್ಲಿ ಈ ತೆಂಗಿನ ಚಿಪ್ಪನ್ನು ಮನೆಯಲ್ಲಿ ಒಲೆ ಉರಿಸಲು, ಅಕ್ಕಸಾಲಿಗರು ಕಬ್ಬಿಣ ಹಾಗೂ ಚಿನ್ನ ಕಾಯಿಸಲು ಮತ್ತು ಅದರಿಂದ ಬರುವ ಮಸಿಯನ್ನು ಬಳಸಿಕೊಳ್ಳಲು ಮಾತ್ರ ಉಪಯೋಗಿಸುತ್ತಿದ್ದರು. ಆದರೆ ಇತ್ತೀಚಿನ ಆಧುನಿಕ ಯುಗದಲ್ಲಿ ತೆಂಗಿನ ಚಿಪ್ಪಿನಿಂದ ಆಕರ್ಷಕ ಅಲಂಕಾರಿಕ ವಸ್ತುಗಳ ನಿರ್ಮಾಣ ಹಾಗೂ ಇತರೆ ವಿಶೇಷ ಕೈಗಾರಿಕಾ ಕೆಲಸಗಳಿಗೆ ಇದನ್ನು ವ್ಯಾಪಕವಾಗಿ ಬಳಸಲಾಗುತ್ತಿದೆ. ಆದರೂ, ಇಷ್ಟೊಂದು ದೊಡ್ಡ ಮೊತ್ತವನ್ನು ನೀಡಿ ಕೇರಳದ ವ್ಯಾಪಾರಿಗಳು ತೆಂಗಿನ ಚಿಪ್ಪುಗಳನ್ನು ಸಗಟಾಗಿ ಖರೀದಿಸಿ ಕೊಂಡೊಯ್ಯುತ್ತಿರುವುದರ ಹಿಂದೆ ಬೇರೆ ಯಾವುದಾದರೂ ದೊಡ್ಡ ಉದ್ದೇಶ ಹಾಗೂ ರಹಸ್ಯವಿದೆಯೇ ಎಂಬ ಕುತೂಹಲ ಈಗ ಸ್ಥಳೀಯರಲ್ಲಿ ಮೂಡಿದೆ.
ಒಟ್ಟಿನಲ್ಲಿ, ಒಂದು ಕಾಲದಲ್ಲಿ ಕಸದಂತೆ ಯಾರಿಗೂ ಬೇಡವಾಗಿದ್ದ ತೆಂಗಿನ ಚಿಪ್ಪಿಗೆ ಇಂದು ಬಂದಿರುವ ಈ ಭಾರೀ ಡಿಮ್ಯಾಂಡ್ ನೋಡುಗರ ಹುಬ್ಬೇರಿಸುವಂತೆ ಮಾಡಿದೆ.
About the Author
