ಮಂಗಳೂರು: ಬೃಹತ್ ಗಾತ್ರದ ಮೀನುಗಳು ಬಲೆಯೊಳಗೆ ಸಿಲುಕಿ ನೀರಿನಿಂದ ಹೊರಕ್ಕೆ ಜಿಗಿಯಲು ಪ್ರಯತ್ನಿಸುತ್ತಿದ್ದರೆ, ಇನ್ನೊಂದೆಡೆ ತಾಜಾ ಮೀನುಗಳನ್ನು ಖರೀದಿಸಲು ಗ್ರಾಹಕರು ಮುಗಿಬಿದ್ದ ದೃಶ್ಯ ಮಂಗಳೂರಿನ ಪಿಲಿಕುಳ ಮತ್ಸ್ಯೋತ್ಸವದಲ್ಲಿ ಕಂಡುಬಂತು. ಪಿಲಿಕುಳ ಲೇಕ್ ಗಾರ್ಡನ್‌ನಲ್ಲಿ ಭಾನುವಾರ ನಡೆದ ಮತ್ಸ್ಯೋತ್ಸವ ಮತ್ತು ಮೀನು ಆಹಾರ ಮೇಳದಲ್ಲಿ ಬರೋಬ್ಬರಿ 1,100 ಕೆ.ಜಿ. ಮೀನುಗಳನ್ನು ಹಿಡಿಯಲಾಗಿದ್ದು, ಕೆ.ಜಿಗೆ ₹160ರ ರಿಯಾಯಿತಿ ದರದಲ್ಲಿ ಮಾರಾಟ ಮಾಡಲಾಯಿತು. ಇದರೊಂದಿಗೆ ಕೆರೆಗೆ 20 ಸಾವಿರ ಮೀನುಮರಿಗಳನ್ನು ಮತ್ತೆ ಬಿಡಲಾಯಿತು.
1,100 ಕೆ.ಜಿ. ಮೀನು ಬೇಟೆ; 2ರಿಂದ 6 ಕೆ.ಜಿ. ತೂಕದ ಮೀನುಗಳು! : ಪ್ರತಿ ವರ್ಷದಂತೆ ಈ ಬಾರಿಯೂ ಪಿಲಿಕುಳ ಮತ್ಸ್ಯೋತ್ಸವದಲ್ಲಿ ಕೆರೆಯ ಮೀನುಗಳನ್ನು ಬಲೆಯ ಮೂಲಕ ಹಿಡಿದು ಗ್ರಾಹಕರಿಗೆ ಮಾರಾಟ ಮಾಡಲಾಯಿತು. ಈ ಬಾರಿ ಸುಮಾರು 1,100 ಕೆ.ಜಿ. ಮೀನುಗಳನ್ನು ಹಿಡಿಯಲಾಗಿದ್ದು, ಒಂದೊಂದು ಮೀನು 2ರಿಂದ 5–6 ಕೆ.ಜಿ.ವರೆಗೂ ತೂಕ ಹೊಂದಿದ್ದವು ಎಂದು ಆಯೋಜಕರು ತಿಳಿಸಿದ್ದಾರೆ.
ಕೆರೆಗಳಲ್ಲಿ ಬೆಳೆದ ರೋಹು, ಕಾಟ್ಲ, ತಿಲೆಪಿಯಾ, ಮುಗುಡು ಹಾಗೂ ಗೌರಿ ಮೀನುಗಳು ಬಲೆಗೆ ಬಿದ್ದಿದ್ದವು. ದೊಡ್ಡ ಗಾತ್ರದ ಮೀನುಗಳು ಬಲೆಯೊಳಗೆ ಒದ್ದಾಡುತ್ತಾ ನೀರಿನಿಂದ ಹೊರಕ್ಕೆ ಜಿಗಿಯಲು ಪ್ರಯತ್ನಿಸುತ್ತಿದ್ದ ದೃಶ್ಯ ನೋಡುಗರ ಗಮನ ಸೆಳೆಯಿತು.
ಬಲೆಯಿಂದ ಮೀನುಗಳನ್ನು ಹೊರತೆಗೆದ ತಕ್ಷಣ ಗ್ರಾಹಕರು ತಮಗಿಷ್ಟದ ಮೀನುಗಳನ್ನು ಆಯ್ಕೆ ಮಾಡಿಕೊಂಡು ಖರೀದಿಸುತ್ತಿದ್ದರು. ಕೆರೆಯಿಂದ ನೇರವಾಗಿ ಬಲೆಗೆ, ಅಲ್ಲಿಂದ ಗ್ರಾಹಕರ ಕೈಗೆ ತಲುಪುತ್ತಿದ್ದ ಮೀನುಗಳ ಮಾರಾಟ ಮೇಳದ ಪ್ರಮುಖ ಆಕರ್ಷಣೆಯಾಗಿತ್ತು.
ಮಾರುಕಟ್ಟೆಯಲ್ಲಿ ₹200; ಪಿಲಿಕುಳದಲ್ಲಿ ₹160ಕ್ಕೆ ಮೀನು! : ಸಾಮಾನ್ಯ ಮಾರುಕಟ್ಟೆಯಲ್ಲಿ ಕೆರೆ ಮೀನಿನ ದರ ಕೆ.ಜಿಗೆ ಸುಮಾರು ₹200ರಷ್ಟಿದ್ದರೆ, ಪಿಲಿಕುಳ ಮತ್ಸ್ಯೋತ್ಸವದಲ್ಲಿ ಕೆ.ಜಿಗೆ ₹160ರ ರಿಯಾಯಿತಿ ದರದಲ್ಲಿ ಮಾರಾಟ ಮಾಡಲಾಯಿತು. ಇದರಿಂದ ಮೀನು ಖರೀದಿಸಲು ಬಂದವರಿಗೆ ಕಡಿಮೆ ದರದಲ್ಲಿ ತಾಜಾ ಮೀನುಗಳನ್ನು ಪಡೆಯುವ ಅವಕಾಶ ದೊರೆಯಿತು.
ಮೀನುಪ್ರಿಯರು ಸ್ಥಳದಲ್ಲೇ ತಮಗೆ ಬೇಕಾದ ಮೀನುಗಳನ್ನು ಆಯ್ಕೆ ಮಾಡಿಕೊಂಡು ಖರೀದಿಸುತ್ತಿದ್ದ ದೃಶ್ಯ ಕಂಡುಬಂತು. ದೊಡ್ಡ ಗಾತ್ರದ ಮೀನುಗಳನ್ನು ನೇರವಾಗಿ ಕೆರೆಯಿಂದ ಹಿಡಿದು ಮಾರಾಟ ಮಾಡುತ್ತಿರುವುದರಿಂದ ಮೇಳದಲ್ಲಿ ಖರೀದಿಯ ಚಟುವಟಿಕೆ ಗರಿಗೆದರಿತ್ತು.
ಮೀನು ಹಿಡಿಯಲು ಶಿವಮೊಗ್ಗದಿಂದ ಬಂದ ಮೀನುಗಾರರು : ಪಿಲಿಕುಳ ಕೆರೆಯಿಂದ ಮೀನುಗಳನ್ನು ಹಿಡಿಯಲು ಶಿವಮೊಗ್ಗದಿಂದ ಮೀನುಗಾರರನ್ನು ಕರೆಸಲಾಗಿತ್ತು. ಶನಿವಾರವೇ ಕೆರೆಗೆ ಬಲೆಗಳನ್ನು ಹಾಕಿ ಮೀನುಗಳನ್ನು ಹಿಡಿಯುವ ಪ್ರಕ್ರಿಯೆ ಆರಂಭಿಸಲಾಗಿತ್ತು. ಬಲೆಗೆ ಸಿಲುಕಿದ್ದ ಮೀನುಗಳನ್ನು ಭಾನುವಾರ ಬೆಳಗ್ಗೆ ಕೆರೆಯಿಂದ ಮೇಲಕ್ಕೆ ತೆಗೆದು ಗ್ರಾಹಕರಿಗೆ ಮಾರಾಟ ಮಾಡಲಾಯಿತು.
ಮೀನು ಹಿಡಿಯುವ ಪ್ರಕ್ರಿಯೆಯನ್ನು ವೀಕ್ಷಿಸಲು ಬಂದಿದ್ದ ಜನರಿಗೆ ಬೃಹತ್ ಗಾತ್ರದ ಮೀನುಗಳನ್ನು ಹತ್ತಿರದಿಂದ ನೋಡುವ ಅವಕಾಶವೂ ದೊರೆಯಿತು. ಕೆರೆಯಿಂದ ಮೀನುಗಳನ್ನು ಹಿಡಿಯುವ ಕೆಲಸದಿಂದ ಹಿಡಿದು ಗ್ರಾಹಕರಿಗೆ ಮಾರಾಟ ಮಾಡುವವರೆಗಿನ ಪ್ರಕ್ರಿಯೆ ಮೇಳದಲ್ಲಿ ಗಮನ ಸೆಳೆಯಿತು.
ಕೆರೆಗೆ ಮತ್ತೆ 20 ಸಾವಿರ ಮೀನುಮರಿಗಳ ಬಿಡುಗಡೆ : ಮತ್ಸ್ಯೋತ್ಸವದ ಸಂದರ್ಭದಲ್ಲಿ ಮೀನು ಮಾರಾಟ ಮಾತ್ರವಲ್ಲದೆ, ಮೀನುಸಂಪತ್ತಿನ ವೃದ್ಧಿಗೂ ಆದ್ಯತೆ ನೀಡಲಾಯಿತು. ಭಾನುವಾರ ಬೆಳಗ್ಗೆ ಪಿಲಿಕುಳ ಕೆರೆಗೆ 20,000 ಮೀನುಮರಿಗಳನ್ನು ಮತ್ತೆ ಬಿಡಲಾಯಿತು.
ಈ ಬಾರಿ ಕಳೆದ ವರ್ಷಕ್ಕಿಂತ ದೊಡ್ಡ ಗಾತ್ರದ ಮೀನುಗಳು ಬಲೆಗೆ ಸಿಕ್ಕಿವೆ ಎಂದು ಅಧಿಕಾರಿಗಳು ಅಭಿಪ್ರಾಯಪಟ್ಟಿದ್ದಾರೆ. ಕೆರೆಯಲ್ಲಿ ಮೀನುಸಂಪತ್ತನ್ನು ಮುಂದುವರಿಸುವ ನಿಟ್ಟಿನಲ್ಲಿ ಮೀನುಮರಿಗಳನ್ನು ಬಿಡುವ ಕಾರ್ಯವೂ ಮೇಳದ ಭಾಗವಾಗಿತ್ತು.
