Departmental inspections by private agencies: Important order from the state government, action to correct the delay..? – ರಾಜ್ಯ ಸರ್ಕಾರದ ವಿವಿಧ ಇಲಾಖೆಗಳಲ್ಲಿ ನಿಯಂತ್ರಣಾತ್ಮಕ ತಪಾಸಣೆ ಮತ್ತು ಸರ್ಟಿಫಿಕೇಶನ್‌ಗಳು ಕಾಲಮಿತಿಯಲ್ಲಿ ಪೂರ್ಣಗೊಳ್ಳದೆ ಇರುವ ಹಿನ್ನೆಲೆಯಲ್ಲಿ ರಾಜ್ಯ ಸರ್ಕಾರ ಮಹತ್ವದ ಆದೇಶ ಕೈಗೊಂಡಿದೆ. ಖಾಸಗಿ ಏಜೆನ್ಸಿಗಳಿಂದ ಇಲಾಖಾ ತಪಾಸಣೆ ಮಾಡುವ ನಿಟ್ಟಿನಲ್ಲಿ ಆದೇಶ ಮಾಡಲಾಗಿದೆ. ವಿಳಂಬ ತಪ್ಪಿಸುವ ನಿಟ್ಟಿನಲ್ಲಿ ಈ ಮಹತ್ವದ ಹೆಜ್ಜೆಯನ್ನು ಇಡಲಾಗಿದೆ. ಹಾಗಾದರೆ ಆದೇಶದಲ್ಲಿ ಏನಿದೆ? ವಿವರ ಇಲ್ಲಿದೆ.
- ಖಾಸಗಿ ಏಜೆನ್ಸಿಗಳಿಂದ ಇಲಾಖಾ ತಪಾಸಣೆ ಮಾಡುವ ನಿಟ್ಟಿನಲ್ಲಿ ಆದೇಶ.
- ವಿಳಂಬ ತಪ್ಪಿಸುವ ನಿಟ್ಟಿನಲ್ಲಿ ಸರ್ಕಾರದಿಂದ ಮಹತ್ವದ ಹೆಜ್ಜೆ.
- ಸರ್ಕಾರದ ಆದೇಶದಲ್ಲಿ ಇರುವ ಪ್ರಮುಖ ಅಂಶಗಳು ಏನೇನು.?
ಬೆಂಗಳೂರು: ರಾಜ್ಯ ಸರ್ಕಾರದ ವಿವಿಧ ಇಲಾಖೆಗಳಲ್ಲಿ ನಿಯಂತ್ರಣಾತ್ಮಕ ತಪಾಸಣೆ ಮತ್ತು ಸರ್ಟಿಫಿಕೇಶನ್‌ಗಳು ಕಾಲಮಿತಿಯಲ್ಲಿ ಪೂರ್ಣಗೊಳ್ಳದೆ ವಿಳಂಬವಾಗುತ್ತಿರುವುದಕ್ಕೆ ಅಂತ್ಯಹಾಡಲು ಸರ್ಕಾರ ಮಹತ್ವದ ಹೆಜ್ಜೆ ಇಟ್ಟಿದೆ. ಪರಿಶೀಲನಾ ಸಿಬ್ಬಂದಿ ಅಭಾವವಿರುವ ಇಲಾಖೆಗಳಲ್ಲಿ, ನಿಗದಿತ ತಪಾಸಣೆ ಹಾಗೂ ಆಡಿಟಿಂಗ್ ಕಾರ್ಯಗಳಿಗಾಗಿ ಅಧಿಕೃತ ಮೂರನೇ ವ್ಯಕ್ತಿ ಏಜೆನ್ಸಿಗಳ ಸೇವೆ ಪಡೆದುಕೊಳ್ಳಲು ಇಲಾಖೆಗಳಿಗೆ ಸ್ಪಷ್ಟ ನಿರ್ದೇಶನ ನೀಡಲಾಗಿದೆ.
ಕ್ಷೇತ್ರ ಮಟ್ಟದಲ್ಲಿ ಸಿಬ್ಬಂದಿ ಕೊರತೆಯಿಂದಾಗಿ ನಿಯಮಿತ ಪರಿಶೀಲನೆಗಳು ಬಾಕಿಯುಳಿಯುತ್ತಿರುವ ಪ್ರಮುಖ ಇಲಾಖೆಗಳಲ್ಲಿ ಆದ್ಯತೆಯ ಮೇಲೆ ಈ ಹೊಸ ವ್ಯವಸ್ಥೆ ಜಾರಿಯಾಗಲಿದೆ. ನ್ಯಾಯಶಾಸ್ತ್ರ ಮಾಪನಶಾಸ್ತ್ರ ಇಲಾಖೆ ತೂಕ ಮತ್ತು ಅಳತೆ ಉಪಕರಣಗಳ ವಾರ್ಷಿಕ ಪರಿಶೀಲನೆ ಹಾಗೂ ಮುದ್ರೆ ಒತ್ತುವಿಕೆ. ಆಹಾರ ಸುರಕ್ಷತೆ ಮತ್ತು ಔಷಧ ಆಡಳಿತ: ಆಹಾರ ಉದ್ಯಮಗಳು, ರೆಸ್ಟೋರೆಂಟ್‌ಗಳು, ಮೆಡಿಕಲ್ ಸ್ಟೋರ್‌ಗಳು ಮತ್ತು ಫಾರ್ಮಸಿಗಳ ವಾರ್ಷಿಕ ಪರಿಶೀಲನೆ ಇದರಲ್ಲಿ ಒಳಗೊಳ್ಳಲಿದೆ. ಕಾರ್ಖಾನೆಗಳು ಹಾಗೂ ಬಾಯ್ಲರ್‌ಗಳ ಇಲಾಖೆಯಲ್ಲಿ ಕೈಗಾರಿಕಾ ಬಾಯ್ಲರ್‌ಗಳ ಸುರಕ್ಷತಾ ತಪಾಸಣೆ ಮತ್ತು ವಾರ್ಷಿಕ ಪ್ರಮಾಣೀಕರಣಕ್ಕೂ ಏಜೆನ್ಸಿಗೆ ಕೊಡಲು ಆದೇಶ ಮಾಡಲಾಗಿದೆ.
ಅಧಿಕಾರಿಗಳ ಅಧಿಕಾರಕ್ಕೆ ಧಕ್ಕೆಯಿಲ್ಲ
ಖಾಸಗಿ ಅಥವಾ ಥರ್ಡ್ ಪಾರ್ಟಿ ಏಜೆನ್ಸಿಗಳು ತಪಾಸಣೆ ನಡೆಸಿದರೂ, ಕಾನೂನಾತ್ಮಕ ನಿಯಂತ್ರಣಾ ಅಧಿಕಾರಗಳು ಸಂಪೂರ್ಣವಾಗಿ ಸರ್ಕಾರಿ ಅಧಿಕಾರಿಗಳ ವಶದಲ್ಲೇ ಇರಲಿವೆ. ಆಹಾರ ಅಥವಾ ಔಷಧಗಳ ಮಾದರಿ ಸಂಗ್ರಹಣೆ, ಜಪ್ತಿ ಹಾಗೂ ಕಾನೂನು ಅಭಿಯೋಜನೆ ಅಧಿಕಾರಗಳು ಸರ್ಕಾರಿ ಅಧಿಕಾರಿಗಳ ಬಳಿಯೇ ಇರಲಿವೆ ಎಂದು ಸ್ಪಷ್ಟಪಡಿಸಲಾಗಿದೆ.
ಏಜೆನ್ಸಿಗಳು ನೀಡುವ ವರದಿ ಮತ್ತು ಆಡಿಟ್‌ಗಳನ್ನು ಆಧರಿಸಿ, ಅಧಿಕಾರಿಗಳು ನಿರ್ದಿಷ್ಟ ಮತ್ತು ಅಪಾಯಸಾಧ್ಯತೆ ಹೆಚ್ಚಿರುವ ಸಂಸ್ಥೆಗಳ ಮೇಲಷ್ಟೇ ಗಮನಹರಿಸಿ ತಪಾಸಣೆ ನಡೆಸಲಿದ್ದಾರೆ ಎಂದು ತಿಳಿಸಲಾಗಿದೆ.
ಕಟ್ಟುನಿಟ್ಟಿನ ಮೇಲ್ವಿಚಾರಣೆ ಮತ್ತು ಕ್ರಮ: ನಿಯಮಿತ ತಪಾಸಣೆ ಖಾಸಗಿ ಏಜೆನ್ಸಿಗಳು ನೀಡಿದ ವರದಿಗಳು ಸರಿಯಾಗಿವೆಯೇ ಎಂದು ಖಚಿತಪಡಿಸಿಕೊಳ್ಳಲು ಇಲಾಖಾ ಅಧಿಕಾರಿಗಳು ಇದ್ದಕ್ಕಿದ್ದಂತೆ ಸ್ಥಳೀಯ ಮರುಪರಿಶೀಲನೆ ನಡೆಸಲಿದ್ದಾರೆ.
ಲೋಪವೆಸಗಿದರೆ ಕ್ರಮ: ಕಾರ್ಯನಿರ್ವಹಣೆಯಲ್ಲಿ ನಿರ್ಲಕ್ಷ್ಯ, ಅಕ್ರಮ ಅಥವಾ ಲೋಪವೆಸಗುವ ಏಜೆನ್ಸಿಗಳನ್ನು ಕಪ್ಪುಪಟ್ಟಿಗೆ ಸೇರಿಸುವುದು ಸೇರಿದಂತೆ ಕಠಿಣ ಕ್ರಮ ಜರುಗಿಸಲಾಗುತ್ತದೆ.
ಸಮಯಬದ್ಧ ಕ್ರಿಯಾ ಯೋಜನೆ: ಎಂಪ್ಯಾನಲ್ಮೆಂಟ್ ನಿಯಮಗಳು, ಅರ್ಹತಾ ಮಾನದಂಡ ಮತ್ತು ಶೀಘ್ರ ಅನುಷ್ಠಾನಕ್ಕಾಗಿ ಆಯಾ ಇಲಾಖೆಗಳು ಕಾಲಮಿತಿಯ ಕ್ರಿಯಾ ಯೋಜನೆಯನ್ನು ಸರ್ಕಾರಕ್ಕೆ ಸಲ್ಲಿಸಬೇಕಿದೆ. ಮುಖ್ಯ ಕಾರ್ಯದರ್ಶಿಗಳ ನೇತೃತ್ವದಲ್ಲಿ ನಡೆಯುವ ಕೆ.ಡಿ.ಪಿ ಪ್ರಗತಿ ಪರಿಶೀಲನಾ ಸಭೆಯಲ್ಲಿ ಈ ವಿಷಯದ ಕುರಿತು ವಿಶೇಷ ಪರಾಮರ್ಶೆ ನಡೆಯಲಿದೆ.
ಕರ್ನಾಟಕ ಆಡಳಿತ ಸುಧಾರಣಾ ಆಯೋಗ-2 ನೀಡಿದ್ದ ಶಿಫಾರಸನ್ನು ಆಧರಿಸಿ, ಪ್ರಜಾಸೇವಾ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಹರ್ಷ ಗುಪ್ತಾ ಅವರು ಈ ಕುರಿತು ಸರ್ಕಾರದ ಆದೇಶ ಜಾರಿಗೊಳಿಸಿದ್ದು, ಎಲ್ಲಾ ಇಲಾಖೆಗಳ ಪ್ರಧಾನ ಕಾರ್ಯದರ್ಶಿಗಳಿಗೆ ಕ್ರಿಯಾ ಯೋಜನೆ ರೂಪಿಸಲು ಸೂಚಿಸಿದ್ದಾರೆ.
About The Author
